Paima Ro

Paima ro
*T.simanjuntak

Mulak sian karejo songon na murhing pardompahan Amani Tingkos.
"Marhua ho Amang siadopanhu?" ninna Nai Tingkos huhut di lehon galas panginumon ni Amantanai.
"Ndang haluar bonus akhir tahun, godang proyek gagal" ninna Amani Tingkos mangalusi sungkunsungkun Parsonduk bolon nai.

"Jai, boha mai Amang Hasian?, nunga tangkas diboto ho, marseragam do ninna Punguan Parompuan di Huria, Natal punguan Hulahula i pe tong do ingkon mar nuansa na rara,  Paniaran pe nuansa na bontar do diarbishon panitia marga".
"Laho pajaithon kebaya otikna haluar do si limaratus ribu i, ueee tahe ....".

diuduti nai Tingkos muse hatana,:
, "Suang songoni Ianakhonta, nunga di surati nasida na laho situhoronta ima sipatu naimbaru dohot abit naimbaru alana pajojorhon liturgi do halaki tujolo".
"molo parsahutaon, tu Puncak do marbona taon, dang huboto sian dia huaron tusi ".

"Imadah ,Inang ni gellenghu....( dialap hosana satongkin), Ia hami pe Angka Ama digogohon mar jas do ninna Katua i, dungi muse nunga ditolopi anggota sude"..."hape  diboto ho do nunga masuak gedekgedek ni jas hu jala nunga malos bonangna".

"Molo songoni, hutelepon majo Angkang boru, atik boi manginjam paima ro dapot arisanta ate Amani Tingkos?"

" Unang Pola Omak ni Tingkos, gabe manambai sahit do annon molo soadong dilehon Angkang i, hansit do mulak balging ndang manjalo" ninna Amani Tingkos songon na gale mangunsande tu dorpi jabuna na so markeleur i.

"Antong , songonon mai Amang siadopanhu: "Unang pola tapaihut marseragam hita, manang manuhor jas naimbaru, holan Ianakhonta ma ta dungketdungketi , Beha inna roham?"

Dialsip sigaretna jala dialusi Amantana i tungki :"Nunga tingkos be nadidok mi Inang di gellenghu, molo tung pe ndang marseragam hita disude punguan manang pesta i, sai unang ma moru ringgas ta laho mamuji Tuhan i" , molo hatahata di dongan sai marlao ro do i".
"Jala pos roham Hasian, marbinege do Ama pargogo naso tudosan i". 

"Huhut ni i, malomalo ma ho boru ni Rajanami pahusorhusor ringgit natinompa pamarenta sisaotik i".
Tompu , hohom nasida padua,...songon na madabu saotik aek ilu sian simalolong ni parsonduk bolon na i.
Dao panatapan dongan saripe i jala habang mardalani pingkiranna sahat tu tonga langit ,paet ijurna jala sangkot di aruaru mambondut.
 
Por muse udan tonga borngin i mandongani hansit ni parngoluon na manorus tu holiholi.

antara Cikarang-Jakarta301017