Ingkon Iba Djumolo Mangkaholongi Dongan

Ingkon iba djumolo mangkaholongi dongan

*sian torsa marumur 101 taon
* Panurat Asli: Gr. Cyrillus Lumbantobing

Panurat ulang : TSimanjuntak

Di na sadari ro ma Si Maria marmeammeam dohot edana na margoar Si Johanna.
Parroha na mangapian do Si Maria i. Molo adong diida manang aha nadenggan di donganna dakdanak na asing ,sai diellem ma i, paima dilehon tu ibana.

Udju i adong ma di Si Johanna sada sigalegale na metmet djala na uli,djadi manigor dipangido roha ni Si Maria ma naeng parmeammeamonna i,dung diida.

Alai mansai holong do roha ni Si Johanna di sigalegale i,tung unang nian laho i sian ibana didok rohana.
Djadi mardandi ma Si Maria ,laho ma ibana djongdjong tu suhisuhi,dang olo be ibana marmeammeam.
Dung i laho ma Si Johanna tu Inana,didokma:" Ale Inang, na djungkat do Si Maria,dang olo be ibana marmeammeam dohot ahu; ndang holong be rohana di ahu."
"Ai dipangido roham naeng haholongan ni Si Maria ho?" ninna Inana i.
"Olo Inang", ninna Si Johanna.

"Molo songoni, bahen ma songon na binahen ni Debata tu ho! Ho ma pardjolo mangkaholongi Si Maria, molo dihaholongi ho ibana,haholonganna ma ho".

Dung i laho ma Si Johanna tu Si Maria djala didokma : " Na ma,ale Maria, djalo ma sigalegale on, parmeammeam ma i!".
Mansai las ma roha ni Si Maria mamereng Si Johanna, didjalo ma sigalegale i. Las ma rohana marmeammeamhon i sadarina i.

Dung mulak Si Maria tu bagas nasida , didok ma tu Inana: "O Inang, tung boruboru na burdju do Si Johanna edangki. Mansai las rohangku di ibana. Djadi do lehononku tu ibana buku gombaran, na hutuhor nambura on dohot hepeng na sian bulu potongan ki?"

"Denggan do" ninna Inana i.

Marsogotna i laho ma Si Maria mandapothon Si Johanna djala dilehon ma buku i tu ibana.

Hutulis ulang sian teks asli "Bunga bunga na angur" tu group Palambok Pusupusu.
Nirongkom djala na pinature ni
Pandita J.H Meerwaldt.
Narumonda 12 Januari 1916

29112017