Minggu manogot

Dungkon mamolus opat bulan tula tarbege ma muse ende sian bagas joro.
Ende mamuji pasangaphon Panompa manisia.

Bogas udan sian borngin tarida dope sian bulung ni jambu mera. Manetek tebateba aekna mangihuthon urat ni bulung andorang so dabu tu tano.

"Ise do na mamamalu poti marende i Ompu Tumonggo boru? Songon ende no 809 hubege hatahatana".

"Ende paporitmu i  do i, molo namarende Si Rade do  naposobulung boru ni panggoreng godokgodok na di jae an, nangkin di sise do ahu tigki mamolus ibana tu gareja"

"Mauliate ma da tadok tu Debata, torop dope angka pinompar parhuta on na ringgas mamelehon dirina di bagas joroNa.
Nunga masihol hian ahu mambege soara sian bagas joro dung diambat pamarenta marpungu sian bulan maret alani sahit kopit on"

-------
Ia bagas Ompu Tumonggo topet ma di hambirang dalan panangkohan tu gareja.
Ganup ari holan juguk di karosi na ma ulaonna dung marsahit matua. Sipata mulak songon dakdanak ma pangalahona. Mura tangis!.
Molo mardalan piga langka nunga humitir be patna. tuani ma adong tungkotna songon pat patoluhon. Dao ma marimbar tingki Kapala kantor pos ibana. Togos timbo pamatangna.

====
" Sian mommonon nunga tatanda Si Rade on...huingot najolo sai juguk do ibana ganup minggu di tangga siminta andorang so mamuhai singkola minggu.  Burju jala toruk rohana tungpe birong saotik pardompahanna ala ditutung mataniari. lambok situtu do pangkuling ni pamanganna muse.
boha ninna roham? i ma tapasaut tu pahompunta dongan sagoarta si Tumonggo ?"

"Nion kopim,dorguk majo binsan las...molo rongkap do... lok ma pahompunta tusi"

"Alusi jo..molo kopi i tong do birong molo so disampur agia aha, alai molo alusmi boi do paubahon rohangku"

" Molo hudok dang satolop ahu , boha ninna roham?"

"Bahen dasorna antong asa binoto manimbangi"

"Na lupa do ho? dua pulu taon nasalpu dibuat Ompungna tanonta jonok singkola na di julu an?"
na lupa do ho sanga naeng marsitampulan Amang Simatua ujui ?"

" Bah.. huingot do i, alai unang antong gabe dohot hona margotagota pahompuna bahen,
muba ari muba do pangombus ni alogo...  !
Among nahinan pe nunga dijalo ibana rupiahsongon tuhor ni tano i dung mardame di kantor polisi"

"Unang ma bah...sosak dope andoarakhu molo huingot pambahenan keluargana uju i... dung i holan sada do pahompunta. hita nama songon ganti Natorasna. Halak parhuta nadao ma dialap unang parhuta on jala nantoari pe nunga hudok tu pahompunta asa unang be dipabagas pargaulanna tu Si Rade"

"Mardame majo ho tu dirim Ale Ompung boru. tu aha hita sai pagarahon mohop ni ateate. pamintop ma i sian bagas roham da!"


Tarbege soara poti marende dohot soara SI Rade  lambok mangendehon:

Nang dao tahe situjuonmi
Ndang maol ho tolhas tusi
Dipaima ho tomuonNa ho
Tung sonang do di lambungNa ho

Nunga tarida nangkok mataniari jala nunga marroan angka ruas mangihuthon protokol kesehatan laho marmiggu
alai Ompu Tumonggo Doli dohot Boru patusoal dope di minggu palimahon dung trinitatis i.

===
Ia si Rade na mulak do ibana tu huta tongon sosialisasi sian Kementerian Pedesaan ibana di kabupaten
Molo si Tumonggo nambura dope di ojakhon gabe Jaksa intelkam di Padang Sidempuan

#Jabelengbeleng