Singkat ni ilumi

Karya : Tony Simanjuntak / Jabelengbeleng
dari Buku Ilu ni Dainang Karya M. Tansiswo Siagian

ho do na sipsip mangendehon ende nauli

tagan marhujinjang ahu di bortianmu

diporo ho hodokmi asa hipas ahu sorang

tangis di abinganmu na lambok i

manginum tarus hangoluan memeni dagingmi

so marnaloja ho mangungkit na dokdok i

mamolus ombik  nang rura dohot dolok,

mamutihi siarum ingkau borngin

tambar ni siubeonta alo ni na male

lupa ho ngalut ni pamatangmi,

unang mintop tataring pardahanami

sipata derem di tanggurungmu do ahu

disungkehon ho huhut mangula mamola pinang i

manggadis gogo asa bolas parbodarian mangudut ngolungki

songon si sada simardung do ho

so ada manungkoli,

so ada nang tondong pagodanggodang gellengmi

benget do ho tung pe sipata tumatangis

marabur ilumi mandege batu pir ni ngolumi

“burjuhon marsingkola anakhu” i do tonam

tungpe marsiak bagi paet ijurmi

alai sabam do ho parmudumudu gellengmi

Inong…..ilumi

aek pogu na mapultak do pasarsar paet ni ngolungki

sigumorsing na so tartuhor do i pahusor parombunan ni ngolu

Inong….ilumi  singkatima i tu ilu las ni roha

loas ahu manghaol ho mangapus ilumi unang sai tangis be ho.

(Bekasi 23 OKtober 2017)
https://www.batakbercerita.com/2020/05/singkat-ni-ilumi.html#more