Merdeka ma!

Merdeka ma!

Panggurit : T. Simanjuntak

Togos dope pamatangna,uli  jala marsinondang dope bohina, sirang ma si Lilis sian dongan saripena.

Dilaon laon ni ari singkola ma si Lilis asa boi manangkok "posisina" diparkarejoan.
Tarhira sataon tagan so lulus singkola marujung ngolu ma boruna sasada i ala ni sahit na binoan sian parsorangna tu portibion on.

Gale ma tondi ni si Lilis, paritoan dohot anggina sada pe ndang adong ro mangapuli nasida, pardonganan pe lao ro do. Muruk ateatena dibagasan, sada pe ndang adong na mangalean abarana gabe hasandaran ni tangis na.

Marhite telepon do hata togar togar dipasahat. Dao do sude diluat sileban angka tondong na ,natorasna pe nungnga parjolo manadingkon ibana.

Nungnga mahiang las nirohana,panortoran na pe muba gabe arsak ni roha. Manirpang ma haporseaonna tu dalan na asing,ima haporseaon na imbaru.

Ro ma na sonang i satongkin mandulo ateatena bahen palambok pusupusu na.

Piga taon leleng dipeop ibana haporseaon na imbaru i marsahit ma nasida, jala koring ma pandompakhanna sibuk na pe nga mago,ndang togos be.

Diboan angkangna ma nasida marubat tu huta na dao, huta ni angka datu medis na tarbarita asa boi nian malum sahitna jala tallus sahit sian pamatangna.

Sada tingki, dungkon sidung marubat dalan, marnipi ma si Lilis.  Di ida ma humaliangna bungabunga di ladang nungnga mullop hembang,tarbege soara ni anduhur ,parbue ni hau pe nungnga mamungka matoras jala bunganai maruap na angur.

Tarbege ma sada soara "hehe ma ho ale hasian ni rohangku na mauliutus,jala ruar ma ho sian partabunian mu".

Duarrr...tarsonggot ma nasida laos dungo mambege soara sian bariba dalan,mapultak sorha ni padati bosi gardan dua.

"Ka..kakak...; dijou si Lilis angkangna.
"Dison do ahu kale"dialusi angkangna alai pamerengan na dipadao asa unang di ida anggina manetek madabu ilu na, dungi ditiop si Lilis ma gomos tangan ni angkangna laos dihataon nasida ma nanget:

" Molo marujung ngolunghu, paborhat ma ahu di bagasan haporseaon hi na parjolo, asa unang lilu ahu.

"huingot dope Ka.. hata pamuhai barita na uli i na tapojojor tingki dakdanak".

"Olo adekhu hasian ,beta rap martangiang hita,talompit tanganta marsitiopan".

"Togihon ma hami mulak tu Ho,ale Jahowa,asa saut hami mulak.
Paimbaru ma ari nami suang songoni di na robi". Amen.

Tos ma hosa ni si Lilis jala Merdeka ma pamatang na dohot tondi na dibagasan dame.

18082017ts

*Tokoh si Lilis holan tokoh fiktif sambing do.