Tolu Baoa na Losok
*NN* Turi Turian Ninna tu Ninna
Adong ma sada raja naung matua, tolu do anakna,
Sude do anakna na tolu on hasianna.
Gabe so diboto manontuhon manang na ise sian nasida
singkatna gabe raja.
Dihajojonok ni ngoluna dijou ma anakna sude asa ro tujolona.
Didok ma : “ Ia ahu na laho mate nama, Alai ndang huboto
Ise sian hamu na boi singkathu. Manang ise na lumosok sian
hamu i ma pabangkitonhu gabe raja “.
Pintor dialusi sihahaan i ma amana i : “ Molo songon i do,
Ahu do na patut raja. Ai molo sanga mamungkuk ahu modom, tung ro aek sian ginjang manetehi tu matanghu, tagonan ma hupapitpit matanghu manaon i, sian na meret ala ni losokhu”.
Alai dialusi sipaitonga i ma : “ Sadia ma losok ni sisongon i
martimbanghon losokhu. Ai molo mansusudu ahu, jala husandehon pathu tu dalihan ala ni ngalina, na tumagon do masoksok pathu, ianggo tung taitonhu pathu sian gara i ala ni losokhu, ala ni i tu ahu ma pasahatonmu harajaon i “.
Manghuling ma siampudan i : “ On ma losokhu ale amang. Tung sugari digantunghon rungkunghon tu punsu ni hau, jala dilehon halak rahut asa huoros tali ni gantungon i , asa malua ahu, tumagon ma ahu mate gantung ianggo tung morot tanganhu mangoroshon i.
Antong damang ma manimbangi manang na boi do losok si songon i pangkeon gabe raja “.
Jadi dibahen raja i ma haputusan :
“ Ia ho ale amang sihahaan holan pasisihon aek sian matam do ho losok, holan dirim do naeng hophoponmu.
Ho pe amang sipaitonga, nunga lumosok ho tutu sian haham, ai nunga pola ro mara tu pamatangmu ndang olo ho paluahon ala ni losokmu.
Alai na umbalga sian i, losok ni anakhu siampudan i do.
Ndang mabiar ibana mate, sahat tu na tos hosana.
Songon i do harajaon, ingkon losok iba paluahon hosaniba laho manghophop bangso dohot luatniba sian musu pangalatei “.
Jadi saut ma siampudan i bangkit gabe Raja
Tidak ada komentar:
Posting Komentar